02.07.21 Palabra di Presidente

Apresiabel miembronan, bishitante i lesadó di nos website.

P’ami ta un plaser di yamabo(so) bonbiní riba nos website nobo.

Na promé lugá mi ke gradisí tur esnan ku a poné nan mes disponibel pa traha riba adaptashon i modernisashon di nos website, spesialmente sr. Erik van Veenendaal ku gratuitamente a lidera e proyekto aki.

Nos mester ta orguyoso ku apesar di e Pandemia mundial, ku a paralisá deporte kompleto pa mas ku un aña, direktiva di BTTB a sigui traha duru pa mantené e federashon di pinpòn aktivo i a sigui planeá aktividatnan pa   desaroyá e deporte di pinpòn na Boneiru. Esaki tabata posibel mirando ku nos spònsernan apesar di e situashon fastioso pa nan kompania, a sigui kere den BTTB i a sigui duna nan sosten na BTTB. Un gradisimentu spesial pa tur nos spònsernan ta na su lugá.

BTTB ta hasiendo hopi esfuerso pa estrecha e relashon ku e federashon di pinpòn na Hulanda (NTTB) i ya ta konta ku nan koperashon pa manda un entrenadó pa yuda ku entrenamentu mas organisá na skolnan i den sentronan di bario. Esaki ku e meta pa desaroyá pinpòn spesialmente bou di nos hubentut.

Komo presidente di BTTB mi ke invitá tur mucha i hende grandi pa bin sera konosí ku nos deporte ku sigur tin su benefishonan pa kada un persona tantu físiko komo mental. Tuma kontakto ku nos libremente pa bo djòin nos aktividatnan.

Konkluyendo mi ke gradisí kada miembro pa nan partisipashon na nos aktividatnan i ke invitá tur pa keda bishita BTTB su website i página di Facebook.

Mi ta deseá boso tur i spesialmente nos miembronan i nan famia tur kos bon i kòrda kuida kurpa den e pandemia ku ta asotando nos isla.

Presidente
Sr. Gilberto (Junny) Vos