15.02.23 In samenwerking met Indebon beschikt BTTB gedurende drie maanden over trainer Joaquin Rodriques

BONEIRIAANSE TAFEL TENNIS BOND (BTTB) A HABRI AÑA 2023 KU ENTRENADOR FIHO PA TRES LUNA

Kralendijk, E federashon di tènis di mesa di Boneiru, Boneiriaanse Tafel Tennis Bond (BTTB) ta sumamente kontentu ku porfin e por tin un entrenador fiho na Boneiru. Esaki pa tres luna, ku mira pa mas luna. Presidente di BTTB señor Junny Vos ta kontentu ku e logro aki: “Esaki sigur ta krea perspektiva pa nos hóbennan ku gusta e deporte di pinpòn na Boneiru. Un di e metanan di BTTB pa basta aña ta pa halsa e nivel di nos hóbenan na Boneiru. Esaki di manera ku algun dia nan lo por partisipá na kompetenshanan internashonal i logra kai den premiashon. Vos ku nunka no a pèrdè speransa ku algun dia esaki lo bira berdat, ta sumamente kontentu ku e ana aki a habri ku un entrenador fiho di pinpòn pa Boneiru. “Nos muchanan merese esaki.”

INDEBON
Vos ta gradisí mui espeshal señor Terrence De Jongh hefe di Indebon ku a aserk’é pa wak kon Indebon por yuda e deporte di pinpòn. Durante un sita ku señor De Jongh i su tim, Vos a trese e preokupashon ku pinpòn tin, i su deseo di tin un entrenador fiho na Boneiru. Vos a presenta un programa di entrenamentu pa e próksimo tres lunanan. Indebon no a duda pa wak e posibilidat pa por kumpli ku e deseo di pinpòn. Vos a keda hopi kontentu ku mesora por a duna un kontesta di parti di Indebon ku nan lo yuda ku un suma di sèn, i BTTB lo kubri e sobrá. Di e manera akí por trese un entrenadó profeshonal di Kòrsou Boneiru. Ta trata di señor Joaquin Rodriquez Castillo di nashonalidat Cubano. Despues di e reunion ku Indebon, ku un akuerdo di kooperashon, Vos a kuminsá hasi trámite mesora pa mas pronto posibel señor Joaquin (El Profè) por yega Boneiru pa kuminsá ku entrenamentu.

PINPÒN NA SKOL
Liseo a aserka BTTB pa un proyekto ku nan tin kaminda hóbennan por skohe pa hasi algu den 6 siman, manera deporte, arte, baile, kulinario i algun mas. Tin basta interes entre alunonan pa praktiká pinpòn. Esaki lo ta dos bes pa siman riba djárason i djabièrnè di 1:45 pa 2:45 na Jong Bonaire. Tambe BTTB ta wak si e entrenador por duna treinen na muchanan di skol básiko, SGB i sentronan di bario. Den e akuerdo ku Indebon a palabra ku señor Joaquin ku ta un dosente di deporte sertifiká di universidat di Cuba, lo por yuda Idebon ku e parti físiko tambe.

ENTUSIASMO
Djadumingu 22 di yanüari señor Joaquin a yega Boneiru, djaluna mainta kaba el a bai yuda Idebon ku aktividatnan deportivo, i atardi 5 or a kuminsá ku entrenamentu pa hóben. BTTB ta hopi kontentu di wak kon kontentu i entusiasmá hóbennan tabata riba nan promé dia di treinen. Señor Joaquin ta un entrenador profeshonal ku a krea basta hóben di Kòrsou ku a logra basta título durante añanan. BTTB ta ofresé treinen na hóbennan ku ke praktiká pinpòn di djaluna pa djaweps di 5pm pa 7pm na Jong Bonaire.

DANKI
BTTB ta gradisí Indebon un bes mas i ta spera ku lo por mantené e entrenador pa hopi luna mas. Esaki mirando ku lo bai tin basta kompetensia Internashonal, i tambe ITTF-America a honra Kòrsou pa ta anfitrion di Campionato del Caribe hubenil 2023 na luna di yüni awor. Riba e kombinashon di potrèt por wak e grupo di 6 hóben ku a kuminsá djaluna ku nan entrenamentu serka entrenador Joaquin (El Profè).