14.02.19 Di Parti Presidente
BONAIRIAANSE TAFEL TENNIS BOND (BTTB) KU KOMPETENSIA DI PINPÒN PA 50+ I TAMBE KOMPETENSIA DI DÒBEL MIKSTO SENIOR/JUNIOR
Bonairiaanse Tafel Tennis Bond den su afan pa krea posibilidat pa mas hende práktika e deporte di pinpòn ta organisá tur luna un kompetensha pa e senior nan meskos ku ta e kaso pa e hubenil nan.
Djaluna dia 18 di febrüari próksimo BTTB ta organisá su promé kompetensia di pinpòn pa e senior nan. E kompetensia ta tuma lugá for di 7or di anochi na Jong Bonaire. E torneo di pinpòn aki ta speshal pa e hungadó nan ku tin 50 aña i ariba.
Kompetensia di Dòbel Senior/Hubenil
Djasabra 23 di febrüari tin e kompetensia di dòbel Senior/Hubenil. E pareha di dòbel lo ta forma pa un hungadó senior i un hubenil. E torneo aki ta tuma lugá na Jong Bonaire di 9 am pa 1 pm. E idea ta pa e Junior hinka man den un makutu i saka nòmber di e señor ku lo ta su partner di dòbel pa asina tur Junior tin e chèns pa saka un hungadó senior fuerte dependiendo di su suerte.
Entrenamentu pa Hubenil
BTTB ta rekordá mayornan ku entrenamentu pa hubenil a start kaba, esaki ta tur djaluna na Jong Bonaire di 5:15 pa 7:15. Motivá e yu pa e partisipá na e entrenamentu nan aki pa e por halsa su nivel di manera ku por forma un selekshon fuerte ku por partisipá na kompetenshanan Internashonal.
Aktividat pa promové pinpòn riba Boneiru
Den nos afan pa promové e deporte di pinpòn riba henter Boneiru BTTB a bini ku e siguiente aktividatnan:
- Aktividat di Pinpòn na Sentro di Bario Nort di Saliña
Mirando e interes di parti di personanan di e bario aki pa práktika pinpòn BTTB a fasilitá e sentro material i tambe un mesa di pinpòn èkstra. Ta e intenshon di BTTB pa usa sentro di bario Nrd di Saliña komo pilot pa despues hiba pinpòn tambe den e otro bario nan di Boneiru
- Koperashon ku Skol Básiko De Pelikaan
Mirando e entusiasmo ku ta biba seka direktiva di skol básiko De Pelikaan, BTTB a yega na un akuerdo pa tur djaluna mainta durante di lès di gym di e skol duna entrenamentu di pinpòn na e alumnonan. Esaki tambe komo un prueba pa despues hiba pinpòn tambe na e otro skolnan di Boneiru.