BTTB Open
BTTB A ORGANISÁ SU PROMÉ KAMPIONATO PA E AÑA AKI.
Bonairiaanse Tafel Tenis Bond (BTTB) den kuadro pa sigui ofresé i krea oportunidat pa su miembronan por práktika e deporte di pinpòn i tambe partisipá na kompetenshanan lokal, BTTB a organisá pa promé bes pa e aña aki un kampionato BTTB Open 2022. Esaki ta pa e klase nan (A) i (B). BTTB organisando e kampionato aki BTTB kier bolbe lanta e interes den e miembro nan i tambe personanan ku ke práktika e deporte di pinpòn. Pinpòn ta un deporte sano ku bo ta práktika den un sala i ku ta lagabu konsentrá i move hopi, pues sigur bon pa bo parti físiko i mental. Djaluna dia 28 di mart último BTTB a organisá e kampionato Open aki kaminda den klase( A) a partisipá e siguiente hungadó nan: Junny Vos, Shaquille Hazel, Almar Nicolaas, Alfed Beukenboon i e kampion di (B) klase Emile Domacasse ku a pasa pa klase (A). Kampion di klase (A) a resultá Alfred Beukenboon, segundo luga Almar Nicolaas, terser lugá Junny Vos, di kuater lugá Shaquille Hazel i na di 5 lugá a resultá Emile Domacasse. Den e kategoria (B) a partisipá Shirley Bernard Winklaar, Luis Arias, Joseline -Liz Rijna i Santiago Lont. Kampion klase (B) a 
resultá Luis Arias, segundo lugá Santiago Lont, terser lugá Joseline –Liz Rijna i na di kuater lugá a resultá Shirley Bernard Winklaar. BTTB ta satisfecho ku e partisipashon di tantu e hungadó nan den (A) i (B) klase. Mester bisa ku e partido entre Junny i Alfred tabata hopi determinante pa wak ken lo bira kampion, si Junny lo a gana Alfred, e ora ei Almar lo por a bira e kampion. E partido entre Junny i Alfred a resultá 3-2 pa Alfred ku a pone ku Alfred a bira e kampion ganando tur su weganan.
Na final di e partidonan, presidente di BTTB señor Junny Vos a hasi entrega di e premio nan na e dos kampion nan tantu di klase (A) komo klase (B), remarkabel si tabata ku pa promé bes BTTB a kambia e premio nan pa algu diferente, mirando ku tur bes ta trofeo, e bia aki a pensa riba un arte di mano di un spil rondó ku por kologá na muraya ku e logo di BTTB i e teksto graba riba e spil, esaki sigur a kai nan agrado di tur hungadó.
