12.06.19 Ronaldi Vos Kampioen Bonaire

Bonairiaanse Tafel Tennis Bond (BTTB) djaluna dia 20 di mei a organisá e kampionato di pinpòn pa saka e mihó tres hungadó nan di e deporte di pinpòn di Boneiru pa aña 2019. BTTB den su afan pa promové i duna oportunidat na hóben nan pa nan por kuminsá práktika e deporte aki i ku posibilidatnan pa yega hopi leu, BTTB ta organisando regularmente kompetensianan pa por wak e nivel di pinpòn di Boneiru i di manera ku por forma un selekshon fuerte pa por representá Boneiru den eksterior.

Junnny Vos presidente di BTTB ta un hungadó pa hopi aña kaba i te ainda e ta praktikando e deporte aki pa e parti físiko i rekreashon. Pinpòn ta un deporte sano i ta lagabu kima kaloria i tambe ponebu usa bo mente regularmente durante un partido.

Djaluna durante e kampionato a partisipá shete partisipante di kual tur shete a hunga kontra di otro den kompetensha di “best of five”.Sigur tabata tin algun wega nan pèrta manera Almar Nicolaas kontra di Nono Vos, Nono a gana 3-2, Alfred Nicolaas ta gana  Diego Anthony 3-2, Alfred Beukenboom ta gana René Evans 3-1, Junny Vos ta gana  René Evans 3-1, Junny Vos ta gana Alfred Beukenboon 3-1, René Evans ta gana Diego Anthony 3-1, Almar Nicolaas ta gana Alfred Beukenboom 3-1. Sobra weganan a wòrdu gana 3-0.

Komo kampion a resultá Ronaldi (Nono) Vos, segundo lugá Almar Nicolaas, i terser lugá Junny Vos. Awor ku BTTB tin su tres mihó hungadó nan, BTTB lo manda e promé dos nan bai partisipá na e kampionato di Master Open ku lo bai tin na Kòrsou dia 14, 15 i 16 di yüni awor, i den luna di sèptèmber di e aña aki pa partisipá na e kampionato di Master Open na Aruba. BTTB sigur ta kontentu ku e resultado nan aki i ta enkurashá e otro hungadó nan pa nan bin sigui práktika pinpòn tur djaluna i djarason di 6-9pm na Jong Bonaire kaminda tin entrenadó nan speshal pa duna guia na interesado nan. Tambe ta rekordá e mayor nan ku tur djaluna di 5:30 pa 7pm tin entrenamentu ku guia pa e hóben nan. Djaluna dia 27 di mei BTTB ta organisá e kampionato hubenil di U13, U15 i U18 den Jong Bonaire, i pa djaluna dia 3 di yüni awor lo bai tin e kampionato di dòbel pa senior. BTTB kier gradisí e miembro nan pa nan partisipashon na e kampionato i lo sigui organisá aktividat si tin e interes pa kuminsá train i partisipá na kompetensha nan.

Riba e kombinashon di potrèt por wak e kampion di Boneiru huntu ku e dos otro hungadó nan ku a sali na di dos i tres puesto.

 

Previous Article
Next Article

Meest recente berichten