25.01.20 Torneo di Pasku Hubenil

BTTB A SERA AÑA 2019 KU UN TREMENDO KOMPETENSHA DI PASKU

Djasabra dia 21 di desèmber Bonairiaanse Tafel Tennis Bond (BTTB) a organisá un kompetensha di pinpòn pa sera aña 2019 huntu ku e miembronan hubenil i senior. BTTB ta mira bek riba un torneo hopi eksitoso mirando e kantidat di partisipantenan hubenil i senior. E sistema di e torneo ta ku hungadónan ta hunga kontra otro i esun ku sali na promé lugá tin e oportunidat pa skohe su premio riba e mesa di premio, sigui e sobra ganadornan di akuerdo ku su posishon final. E aña aki a partisipá 14 hungadó hubenil i 14 senior loke ta sigur un adelanto grandi di partisipante kompará ku e aña anterior. A repartí tantu e seniornan komo e hungadó nan hubenil den tres klase A,B i C. Asina a duna e posibilidat na e hungadónan ku un nivel mas abou pa por kompetí kontra hungadónan di nan mesun nivel. BTTB ta hopi satisfecho ku e kantidat di partisipante i ta mira bek riba un torneo eksitoso. Tambe BTTB a hasi uso di e sistema mundial digital ku ta wòrdu usa durante kompetenshanan internashonal pa konta e skor nan.

Na apertura di e torneo a hiba palabra señor Peter Silbere, hefe di Indebon i tambe señora Giselle Emers den representashon di diputado Kroon. Despues di apertura a kanta himno di Boneiru i señor Junny Vos presidente di BTTB a habri ofishal e kompetensha. Pa 12:30 tur e partidonan a terminá i a invitá tur e hungadónan i e presentenan pa pasa i disfrutá di un dushi almuerso di Pasku. Despues di e almuerso a sigui e resultado nan di kada klase ku ta siguiente. Klase A hubenil 1) Mijuar Nicolaas, 2) Jutian Nicolaas ,3) Yaedien Rosaria. Klase B hubenil, 1) Zhakeer Domacasse, 2) leonardo Mejia, 3) Trinity Janga,4) Angenie Nicolaas, 5) Darjuan Nicolaas i  6) Kyzayah Ramos. Klase C hubenil, 1) Asantenie Nicolaas, 2) Andres Valle, 3) Jeronimo Lont, 4) J’Shua Davelaar i 5) Trevor Janga.

Den e tres klasenan di senior resultadonan tabata lo siguiente:  Klase A, 1) Almar Nicolaas, 2), Leo Domacasse 3) Rene Evans, 4) Junny Vos, i 5) Carlos Briceño. Klase B, 1) Shaquil Hazel, 2) Emanuel Lont i 3) Alexander Cicilia. Klase C, 1) Junny van Arneman, 2) Cesar Mejia, 3) Shirley Winklaar, 4) David Rom i 5) Chals Lont.

Junny Vos presidente di  BTTB na final a gradisí tur e partisipantenan pa nan partisipashon i tambe a gradisí na su direktiva pa e tremendo trabou ku a wòrdu hasi pa kordinashon, preparashon i dedikashon pa e kompetensha pa asina BTTB por a sera aña 2019 ku su miembronan. Tambe Vos a gradisí tur e spònsernan ku durante 2019 a koperá pa BTTB por a organisá su aktividatnan pa desaroyo di pinpòn. Sr. Vos a deseá tur presente un Bon Pasku i un aña nobo ku hopi bendishon i tur kos bon pa e deporte di pinpòn di Boneiru.

 

Previous Article
Next Article