KAMPIONATO HUBENIL ABC

Bonairiaanse Tafel Tennis Bond (BTTB) ku ta e federashon di tènis di mesa aki nan Boneiru, a risibí un invitashon di parti di Federashon Tènis di Mesa Kòrsou (FTMK) pa partisipá nan un kampamentu i ku na final lo organisá un kampionato Internashonal entre e tres islanan, Aruba, Boneiru i Kòrsou. E idea tabata pa hungadó nan hubenil di entre 9 pa 17 aña sigui 6 dia di kampamentu ku e entrenadó señor Ruddy Raga di Aruba, i na final organisá un kampionato entre e tres islanan. Lamentablemente e hungadó nan di Aruba no por a yega Kòrsou mas, i e kampamentu a sigui ku partisipashon di hungadó nan hubenil di Kòrsou i Boneiru.

BTTB ta hopi gradisí na Federashon Tènis di Mesa Kòrsou, ku a krea e posibilidat aki di manera ku nos hungadó nan hubenil di Boneiru por a partisipá i asin’aki haña a e chèns pa halsa nan nivel. Djabièrnè dia 4 di òktober a sali pa Kòrsou un delegashon di 7 hungadó i nan coach señor Junny Vos ku alabes ta e presidente di (BTTB) pa Kòrsou ku Ezair ku tambe a koperá ku nos federashon. Durante 6 dia di 9or di mainta te ku 3or di atardi e hóben a train tantu e parti físiko i parti di tènis di mesa. Señor Vos ta sigui splika ku e 6 dia nan aki a yuda e hóben nan bon, i ya kaba por a wak ku nan nivel a subi i ku nan tabata kla pa partisipá nan e kampionato.

Djaweps dia 10 di òktober a tene e kampionato i Boneiru a bai ku 4 di e 6 premionan. E kampionato tabata di U11 i U17 pa U11 a partisipá 7 hungadó 4 di Boneiru i 3 di Kòrsou, Boneiru a bai ku tur tres premio. Promé lugá di U11 a resultá Lucky PANDEY, na di dos lugá a resultá Daniel Fernandez Ojeda i di tres lugá Livia FENG. Pa U17 tabata tin 10 hungadó, di kual 4 di Boneiru, i 6 di Kòrsou, Boneiru a bai ku e di dos lugá, bon weganan hunga dor di Xavio Clarenda. Pa otro aña den e mesun temporada aki, BTTB lo organisá e ABC kampamentu na Boneiru. Coach Junny Vos ta hopi kontentu i orguyoso di e hóbennan di Boneiru ku pa promé bes nan por a partisipá na un kampionato Internashonal i ku bon resultado. Presidente di BTTB kier a gradisí na e spònsernan ku a kere den e hóbennan, i ku a koperá pa ku e soño por a realisá pa nan. Señor Junny Vos a bisa nos ku e hóbennan tambe a haña oportunidat pa haña entrenamentu di e legendario Bettine Vriesekoop ku tabata kampion europeo na dos okashon 1982 i 1992, na 1999 Bettine a wòrdu rekonosé kome e mihó hungadó di tènis di mesa di siglo.

Gradisimentu na; Akkermans Auto Supplies, EZair, Fundashon Wega di Number Boneiru, Milano, Enterprise Rent – A – Car Bonaire i Indebon. Tambe BTTB kier gradisi nan coach Marie-Antionetta Keli ku durante sinku luna a train nos hóben nan aki nan Boneiru di manera ku nan por a halsa nan nivel ku nan por a kompetí na Kòrsou.Durante entrega di premio nan Kòrsou presidente di BTTB a sorpresa Marie-Antoinette Keli ku un bunita “token” komo embahadora di Tènis di Mesa di Boneiru, ku e entrega aki BTTB a ortoga na 6 persona e distinguido rekonosementu aki.