Torneo Habri

Den kuadro di un bishita kaminda 5 persona (Arnold, Henk, Jan, David i Jan-Hendrik) di klase 2 for di Hulanda a pasa serka BTTB ku e petishon si nan por a kompartí nan eksperensia ku esnan lokal kaminda ku hóbennan tambe por a haña e oportunidat úniko aki di atkerí mas konosementu dor di sigui halsa nan nivel.

Torneo habri
BTTB a haña esaki tabata un bon idea i den korto tempu a trata na organisá un torneo habri ku a tuma lugá riba  djárason 26 di Yüni 2024, kaminda ku un bishitante di hermana isla Kòrsou Jacinto tambe a partisipá. En total a partisipá 10 persona repartí den dos klase. Klase A (Arnold, Henk, Jan, Rene Evans i Alfred Beukenboom) i Klase B (David, Jan-Dirk, Almar Nicolaas, Marie-Antionette Keli i Jacintho Zimmerman) .

Start
Wega nan a kuminsá 7:30 or di anochi i a dura te ku 10:45pm. Segun e sekuensia di puntuashon total di kada hungadó di 1 te ku 5 den kada klase a determiná ken lo ta esun ku lo keda na promé, dos, tres te ku di djes lugá.

Resultado
E persona ku a keda na promé lugá tabata David ku a enfrentá Arnold. Na di tres lugá Henk a resultá ku a superá Jacintho. Alfred a keda na di 5 lugá despues ku e la sa di gana di Almar. Rene a keda na di 7 lugá debí ku Jan-Dirk no por a kontinuá i na di 9 lugá Jan a sa di gana di  Marie-Antionette.

Jan na nòmber di e delegashon hulandes a demostrá nan muestra di apresio dor di a opsekiá dos nèt na BTTB pa a organisá e torneo habri. BTTB di su banda a yama danki na e delegashon di Hulanda i ta spera di por mira e delegashon hulandes pronto bek. BTTB  por mira ku e sekshonnan aki a krea hopi konosementu na esnan hóben i senior i alabes e tereno habri aki den un forma amistoso,  kada persona por a hisa nan nivel di kompetensia ku sigur ta un adelanto pa kada persona ku a eksperensia e nivel kon e delegashon hulandes ta práktika e deporte di pinpòn .