Kopa Leo Domacasse

BONAIRAANSE TAFELTENNIS BOND (BTTB) A HONRA UN PERSONA KU A HASI HOPI PA E DEPORTE: TORNEO ANUAL ‘KOPA LEO DOMACASSÉ’

Kralendijk, Boneiriaanse Tafeltennis Bond (BTTB) den su afan pa promové i halsa nivel di pinpòn na Boneiru, a disidí di honra señor Leonel (Leo) Domacassé ku un torneo anual na su nomber: torneo Kopa Leo Domacassé.

Pashon pa pinpòn
Direktiva di BTTB a bin riba e idea pa e torneo, mirando kuanto kos Domacassè a hasi i ta hasiendo pa desaroyo di pinpon na Boneiru. Leo a kuminsá praktiká pinpòn for di mucha, i for di e tempu ei por a wak e pashon ku Leo tabatin pa pinpon. For di mucha, e tabata partisipá na torneo i kampionato. El a sigui hasi esaki komo hoben, komo adulto i hasta awor komo veterano. Leo su pashon pa pinpòn ta asina grandi ku el a disidi di forma parti di direktiva di e federashon di pinpòn di Boneiru (BTTB) i a fungi komo su sekretario pa mas ku 10 aña. Leo ku su kasá Lilian Donacassè a dedika hopi aña di nan bida pa yuda desaroyo di pinpòn na Boneiru, Lilian komo presidente i leo komo hungadó i miembro di direktiva. Huntu nan a trein hopi hóben i organisá hopi kompetensha. Leo ta un persona ku semper ta kla pa duna un man, i semper a sostene direktiva ku determinashon i boluntat primeramente pa progreso di hobennan ku ta praktiká e deporte aki.

Basta trofeo i kopa
Leo semper a gusta e deporte di pinpòn pa su téknika i e rapides ku e bala ta subi mesa. Ainda komo veterano e ta gana hopi hungadó mas hóben i ta duna bon kompetensha. E tin basta trofeo i kopa den su kolekshon ku el a gana komo mihó hungadó. Pa tur loke Leo a hasi i ta nifika pa e deporte di pinpòn na Boneiru, direktiva di BTTB huntu ku su miembronan kier a honr’é ku e promé torneo anual dediká na su nòmber.

Promé torneo
Djaluna útimo 13 di mart, BTTB a organisá e torneo Kopa Leo Domacassè na Jong Bonaire. Tabata tin tres kategoria, klas A, B i C. Den klase C a partisipa 5 miembro nobo di BTTB, Ron Sewell, Viola Prissi, Geertje Breveling, Walter Huszar i Ronny van Craenen. Ronny van Craenen a sali kampion di klase C. Den Klase B a partisipá Shirley Winklaar, Sint Jago Lont i Ottmar Marti. Sint Jago Lont a sali kampion di klase B. E hungadónan di klase A tabata Almar Nicolaas, Rene Evans, Junny Vos, Nono Vos, Shaquil Hazzel, Alfred Beukenboon i Reinier Baijens. Nono Vos a sali kampion den e klase akí. BTTB ta kontentu ku e torneo aki mirando e kantidat di persona ku a partisipá..

Pa hóben
Djasabra 25 di mart awor, Kopa Leo Domacassè ta sigui pa hóben. BTTB ta organisá esaki pa e dos kategorianan U9 i U13. Tin dos grupo di mucha ku ta den ful treinen hinter siman serka Profè na Jong Bonaire. Lo tin medaya di oro, plata i bròns pa tur dos kategoria. Komo muestra di gratitut pa tur loke el a hasi pa pinpòn di Boneiru, BTTB a honra Domacassè tambe komo un di e embahadornan di pinpòn di Boneiru ku un bunita token di glas. Riba e kombinashon di potrèt por wak momentunan durante e partidonan i e momento ku presidente di BTTB señor Junny Vos a entregá e token na señor Leo Domacassè. Tambe e tres kampionnan risibiendo nan trofeo for di man di señor Domacassè.